Susa argitaletxeak poesia eta narratiba bildumetako liburuak e-book formatuan salgai jarri ditu bere webgunean. 66 idazleren 142 literatur liburuko bildumarekin abiatu du egitasmoa. Bi formatutan (epub eta pdf) eskaintzen dituzte liburuak eta guztiek prezio bera dute: 3,54 euro.

Euskal Liburuaren Gauan Mariasun Landa idazleari eman zioten aurtengo Dabilen Elea saria. Esker oneko eta egindako lanaz harro, Landak saria Asun Balzola, Joxean Ormazabal eta Xabier Leteri eskaini zien. Euskal liburugintzaren inguruan lanean ari diren bost elkarte hauen ekimenez banatzen da Dabilen Elea saria: Euskal Editoreen Elkartea (EEE), Euskal Idazleen Elkartea (EIE), Euskal Irudigileen Elkarte Profesionala (APIE-EIEP), Euskal Itzultzai- le, Zuzentzaile eta Interpreteen Elkartea (EIZIE) eta Galtzagorri Haur eta Gazte Literaturaren Elkartea. Aurretik Antton Olariaga (2008), Juan Mari To- rrealdai (2009) eta Itxaropena argitaletxea (2010) izan dira sari hau eskuratu dutenak.

Aurrera doaz Durangoko Euskal Liburu eta Disko Azokaren prestakuntza lanak. Ahotseneak euskal sortzaileei deialdia luzatu die dagoeneko gunean parte hartu dezaten eta Gerediaga elkartea bete-betean dago azoka aurrera ateratzeko lanetan, besteak beste, gonbidatua den galiziar kulturarekin harremanak estutzen.

Goiatz Labandibar (Oiartzun, 1985) izan da aurtengo Igartza Sariaren irabazlea. Interrail behin-behineko izena daukan ipuin-bildumaren egitasmoa diruz laguntzea erabaki dute Igor Estankona, Xabier Etxeberria eta Karmele Jaio epaimahaikideek. Urte beteko epea du orain sarituak bere lana bukatzeko.